Муроҷиатномаи Раис

Муҳтарам хонумон ва ҷанобон,

Аз номи Раёсати Бонки давлатии амонатгузории Ҷумҳурии Тоҷикистон «Амонатбонк» ба кулли мардуми шарифи кишвар, аз ҷумла мизоҷони Бонк, ки ба Амонатбонк дар низоми бонкии ҷумҳурӣ ҳамчун бонки давлатӣ эътимоди зиёд доранд ва ҳамзамон ба шарикони дохилию хориҷии Бонк, дуруду паёми бепоёни хешро мерасонам.

Амонатбонк яке аз куҳансолтарин бонки ҷумҳурӣ ба ҳисоб рафта, дар гузашта ва имрӯзу фардо ҳам, вазифаи асосии он татбиқи як ҳиссаи сиёсати иҷтимоии давлат ва хизматрасонии саривақтию босифат ба мизоҷон мебошад.

Имрӯзҳо Амонатбонк бо шабакаи васеи худ, яъне 75 филиал, 547 маркази хизматрасонии бонкӣ ва зиёда аз 3000 нафар кормандон, ҳамчун даста ё нерӯи пурқувват ва ниҳоят ба мардум наздик, ба мизоҷон дар тамоми манотиқи ҷумҳурӣ хизматрасониҳои гуногуни бонкиро пешниҳод намуда истодааст.

Дар ин раванд, шумораи пасандозгузорони Бонк сол аз сол зиёд шуда, дар соли 2021 ба 1,6 млн. нафар расидааст.

Новобаста ба шиддати буҳрони молиявии ҷаҳонӣ ва таъсири пандемияи коронавируси COVID-19, пардохтпазирии Бонк дар сатҳи баланд нигоҳ дошта шуда, ҳамаи уҳдадориҳои Бонк дар назди мизоҷон, хусусан пардохти фоизҳои пасандозҳо ба аҳолӣ сари вақт ва бемамоният иҷро гардида истодааст.


Афзоиши сармояи Бонк, фаъолияти пурсамар дар самти ҷалби маблағҳои озоди аҳолӣ ва иштирок дар барномаҳои маблағгузорӣ барои дастгирии соҳибкории хурду миёна имкон дод, ки дар соли 2021 ба зиёда аз 72 ҳазор муштарӣ 1,4 млрд. сомонӣ маблағҳои қарзӣ пешниҳод гардад. Дар натиҷа, дар муқоиса ба соли 2020 шумораи қарзгирон 44% ва ҳаҷми қарздиҳӣ 34% зиёд гардидааст.

Бонк дар соли ҳисоботӣ дар раванди татбиқи ҳадафи чоруми миллӣ-саноатикунонии босуръати кишвар ва таъмини амнияти озуқаворӣ 33%-и қарзҳоро ба соҳаҳои саноат ва кишоварзӣ пешниҳод намудааст.

Дар соли 2021 аз ҳисоби ҷалби сармояи мустақим, аз ҷумла 43 млн. доллари ИМА-и бонкҳои ҷумҳурии Ўзбекистон ва 5 млн.доллари ИМА-и ҶС «Ширкати сугуртаи содиротии «KAZAKHEXPORT»-и қазоқистон, ба 27 ширкати ватанӣ дар ҳаҷми 16,1 млн. доллари ИМА барои ворид намудани молу маҳсулот қарзи бонкӣ пешниҳод карда шуд.

Бояд қайд намуд, ки дар ҳамкориҳои Амонатбонк ва “Сбербанк”–и Федератсияи Россия саҳифаи нав боз гардид. Гурўҳи кории Амонатбонк зимни сафари корӣ бо ҶСО «Сбербанк России» созишномаи ҳамкориро ба имзо расонида, масъалаҳои ба роҳ мондани ҳамкориҳо дар самти табодули таҷриба, татбиқи технологияҳои муосири рақамӣ дар фаъолияти ҳаррўза, тарҳрезӣ ва амалисозии маҳсулотҳои бонкӣ барои муҳоҷирони меҳнатӣ, ҳамоҳангсозии мавқеъҳо дар доираи лоиҳаи «Миллион муҳоҷир» бо иштироки ҶСО «Сбербанк России» ва баҳрагирӣ аз хизматрасониҳои экосистемаи Сбербанк мавриди баррасӣ қарор дода шуд.

Дар иртибот ба эълон гардидани солҳои 2019-2021 “Солҳои рушди деҳот, сайёҳӣ ва ҳунарҳои мардумӣ”, Бонк ҷиҳати саҳмгузорӣ дар рушди соҳаи сайёҳии мамлакат, эҳё намудани анъанаҳои миллӣ ва рушди минбаъдаи ҳунарҳои мардумӣ, аз ҳисоби захираҳои худӣ дар соли 2021 ба 272 нафар 8,3 млн. сомонӣ маблағҳои қарзӣ пешниҳод намудааст, ки нисбат ба соли 2020 60% зиёд мебошад.

Бо мақсади саҳмгузорӣ дар таъмини амнияти озуқаворӣ ва татбиқи дигар барномаҳои давлатӣ дар самти дастгирии иҷтимоии аҳолӣ, Бонк соли 2021 иқдомҳои қарзҳои имтиёзнокро таҳти унвони «Кишоварз», «Дониш», “Истиқлол” ва “Орзуҳои солинавӣ” роҳандозӣ намуд.

Дар оянда ҳам, ҷиҳати болоравии эътимоди мардуми кишвар ба низоми бонкӣ бо роҳи дастрасии бештари маблағҳои қарзӣ ба мизоҷон, рушди соҳибкории хурду миёна, дастгирии молистеҳсолкунандагони ватанӣ, баланд бардоштани сатҳи иҷтимоии аҳолӣ, эҳёи ҳунарҳои мардумӣ ва умуман саҳмгузорӣ дар рушди устувори иқтисодиёти кишвар иқдомҳои Бонк идома меёбанд.

Бонк ҷиҳати саҳмгузорӣ баҳри вусъат бахшидани корҳо дар самти амалисозии иқтисодиёти рақамӣ ва ҷорӣ кардани технологияҳои рақамӣ дар соҳаҳои иҷтимоиву иқтисодӣ ва дар ин замина осон ва шаффоф гардонидани амалиётҳо, кам намудани истифодаи пули нақд дар муомилот, вусъат бахшидани ҳисоббаробаркунии ғайринақдӣ, пешгирии хавфҳои амалиётӣ, нуфузу эътибор ва дар маҷмўъ паст кардани дараҷаи хавфҳо, бо роҳи харидорӣ ва насб намудани барномаҳои худкори электронӣ, ба раванди автоматикунонии фаъолияти соҳа ва муҷаҳҳазгардонии техникии филиалҳо тақвият дода истодааст.

Бояд тазаккур дод, ки ҷиҳати ҷорӣ намудани технологияи қабули андозҳо ва пардохтҳои ҳатмӣ аз аҳолӣ, то имрӯз 358 нуқтаи қабул дар марказҳои хизматрасонии филиалҳои Амонатбонк дар шаҳру ноҳияҳои ҷумҳурӣ бо истифода аз барномаи “Қабули пардохтҳо” фаъолият намуда истоданд, ки дар муқоиса ба соли 2020 58 адад зиёд аст.

Инчунин, бо мақсади таъмини шаффофият дар самти қабул ва интиқоли маблағҳои коммуналӣ, то имрӯз ба барномаи “қабули маблағҳои коммуналӣ” шумораи 667 адад нуқтаҳо ва марказҳои хизматрасонии бонкӣ пайваст карда шудааст, ки дар муқоиса ба соли 2020 82 адад зиёд аст.

Ҳамзамон, Бонк ҷиҳати вусъат бахшидани амалияи ҳисоббаробаркуниҳои ғайринақдӣ дар муомилоти пулии кишвар ва ба таври васеъ ҷорӣ кардани ин тартиб дар пардохти хизматрасониҳо чораҷӯӣ намуда истода, то имрўз бо 7 916 адад корхонаву ташкилотҳои буҷетӣ ва ғайрибуҷетӣ тавассути кортҳои пардохтии бонкӣ дар доираи лоиҳаи “Музди меҳнат” ҳамкориро ба роҳ мондааст, ки нисбат ба соли 2020 148 адад зиёд мебошад.

Амонатбонк шумораи 16 адад ташкилотҳои қарзиро ба низоми биллингии худ пайваст намуд. Ташкилотҳои қарзии мазкур имкон пайдо намуданд, ки тавассути низомҳои дохилиии корти бонкӣ, ҳамёни электронӣ ва мобилбонк ба муштариёни худ дар самти пардохти ҳаққи қувваи барқ, об ва шабакаҳои гармидиҳанда хизматрасонӣ намоянд.

Шумораи дорандагони кортҳои пардохтии бонкӣ ба ҳолати 31 декабри соли 2021 ба 1 миллиону 463 ҳазор нафар расидааст.

Бояд қайд намуд, ки Амонатбонк ҷиҳати боз ҳам дастрас гардонидани хизматрасониҳои бонкӣ ба аҳолӣ ва фароҳам овардани шароити мусоиди кору хизматрасонӣ дар марказҳои хизматрасониҳои бонкӣ, иқдомҳои пай дар пайро амалӣ намуда истодааст.

Дар баробари ин, фаъолияти 26 адад хазинаҳои бегоҳӣ ва шабона дар шаҳру ноҳияҳои Душанбе, ҳисор, Исфара, Хуҷанд, Бохтар, Кўлоб, Хоруғ ва Турсунзода, ки ба аҳолӣ ва сайёҳон хизматрасониҳои гуногуни бонкиро пешниҳод намуда истодаанд, пурзўр карда шуд.

Аз ҷумла, Бонк бо мақсади дастрасии қулай ба хизматрасониҳои бонкӣ, тайи се соли охир иқдоми ба ҷойҳои сераҳолӣ ва ба сайёҳон дастрас кўчонидани марказҳои хизматрасонии бонкиро амалӣ намуда истодааст. То ба имрўз 233 адад ё 42,6%-и марказҳои хизматрасонии бонкӣ, ки 41 адади он ба соли 2021 рост меояд, ба шафати роҳҳои байналмилалӣ, дохили маркази савдову бозорҳо ва чорроҳаҳо кўчонида шуданд.

Татбиқи саривақтии дастуру супоришҳои Асосгузори сулҳу Ваҳдати миллӣ, Пешвои миллат, Президенти кишвар, муҳтарам Эмомалӣ Раҳмон ва ҳадафҳои гузоштаи Бонк тибқи самтҳои афзалиятноки фаъолияти Бонк барои соли 2021 имкон дод, ки дар маҷмӯъ рушди босуботи соҳа нигоҳ дошта шуда, иҷрои нишондиҳандаҳои асосӣ дар соли 2021 тибқи ҳадафҳои афзалиятнок таъмин гарданд.

Дар ин давра даромади Бонк то андозбандӣ 100,4 млн. сомонӣ ва баъди андозбандӣ 66,2 млн. сомониро ташкил намуд, ки нисбат ба соли 2020 29,1% зиёд мебошад.

Ҳаҷми сармояи Бонк дар соли 2021 ба 575,7 млн. сомонӣ расонида шуд, ки нисбат ба соли 2020 25,7% зиёд мебошад.

Дороиҳои Бонк маблағи 4,4 млрд. сомонӣ ва уҳдадориҳои Бонк 3,8 млрд. сомониро ташкил додааст.

Бонк дар соли 2021 дар маҷмуъ 110 млн. сомонӣ маблағҳои андозу пардохтҳои ҳатмиро аз рӯи фаъолияти худ ба буҷетҳои ҷумҳуриявӣ ва маҳаллӣ гузаронидааст, ки нисбат ба соли 2020 14,2% зиёд мебошад.

Дар хотима гуфтаниям, ки Бонк минбаъд ҳам фаъолияти худро ҷиҳати иҷрои дастуру супоришҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, бомуваффақият татбиқ намудани нақшаҳои стратегӣ, мустаҳкам намудани мавқеи худ дар бозори байнибонкии ҷумҳурӣ дар заминаи баланд бардоштани сифати хизматрасониҳои бонкӣ ва кам намудани хавфҳои бонкӣ идома медиҳад.

Ман сидқан миннатдории худро ба шарикон ва мизоҷони Бонк барои боварӣ ва дастгириашон иброз намуда, ба идомаи ҳамкориҳои судманд умедворам.

Раиси Раёсати БДА ҶТ “Амонатбонк”

Икромӣ Сироҷиддин Салом


Назарсанҷӣ оид ба баҳодиҳии хизматрасониҳои БДА ҶТ Амонатбонк